काठमाडौं । भारतमा लगेर मिर्गौला चोरेको आरोपमा चार जना पक्राउ परेका छन्।
मानव बेचबिखन अनुसन्धान ब्युरोले मिर्गौला निकालेको आरोप लागेका चारजनामध्ये तीन जनालाई मानव तस्करीमा म्याद थपका लागि काठमाडौं जिल्ला अदालत लगेको छ।
सिन्धुलीका ३७ वर्षीय खिलबहादुर भुजेलको मिर्गौला चोरी गर्ने कार्यमा संलग्न रहेको आरोपमा ३ जनालाई संगठित अपराध र मानव तस्करीमा म्याद थपका लागि अदालत लगिएको हो ।
३७ वर्षीय भुजेललाई रोजगारीको प्रलोभन देखाई भारत लगेर मिर्गौला चोरी गरेको आरोपमा ब्युरोले अनुसन्धान गरेको थियो। प्रारम्भिक अनुसन्धानबाट गिरोहले प्रत्येक व्यक्तिलाई ५ देखि ७ लाख रुपैयाँ दिने प्रलोभन देखाएर भारत पुर्याउने गरेका थिए।
आर्थिक अवस्था कमजोर भएका युवाहरूलाई नै लक्षित गरी यो धन्दा चलाएको पाइएको छ।
