धादिङ । धादिङको नीलकण्ठ नगरपालिका–४ का सुलभ श्रेष्ठ सोमबार साँझ अज्ञात समूहको धारिलो हतियार प्रहारबाट घाइते भएका छन्।
घरको गेटमै आक्रमणमा परेका श्रेष्ठको हाल धादिङ अस्पतालमा उपचार भइरहेको छ। अस्पतालका अनुसार उनको थाइमा गहिरो चोट लागेको छ भने अनुहारमा समेत चोट पुगेको छ।
जिल्ला प्रहरी कार्यालय धादिङका प्रहरी नायब उपरीक्षक सुवास हमालका अनुसार श्रेष्ठ नीलकण्ठ बालमन्दिर माध्यमिक विद्यालयको कक्षा १० मा अध्ययनरत विद्यार्थी हुन्। प्रारम्भिक अनुसन्धानमा उनको साथीभाइबीचको झगडाका कारण घटना भएको अनुमान गरिएको छ।
घटनाबारे थप अनुसन्धान भइरहेको प्रहरीले जनाएको छ।
