निराज रानाभाट,
ललितपुर – ब्राइट फ्युचर माध्यमिक विद्यालय र कलेजको १७ औं वार्षिक उत्सवको अवसरमा ‘ बृहत रक्तदान कार्यक्रम ’ सम्पन्न भएको छ । ललितपुरको ललितपुर महानगरपालिका -१५, सातदोबाटोमा रहेको उक्त कलेजले आज बिहान ०८:०० बजेदेखि १०:३० बजेसम्ममा रक्तदान कार्यक्रम गरेको हो । उक्त कार्यक्रममा ३३ जनाले रक्तदान गरेका छन् । उक्त रक्तदान कार्यक्रममा शिक्षकशिक्षिका, विद्यार्थी, अभिभावक तथा इज्छुक व्यक्तिहरुले उत्साह पूर्ण उपस्थितिमा ३३ पिन्ट ( युनिट ) रगत संकलन गरिएको कलेजले जानकारी दिएको छ । उक्त रक्तदान कार्यक्रमको प्राविधिक सहयोग रक्त सञ्चार केन्द्र पुल्चोक शाखा ( ललितपुर ) ले गरेको थियो ।
१७ औं वार्षिक उत्सवको अवसरमा ‘ रक्तदान जीवनदान ’ भन्ने मूल नाराकासाथ कार्यक्रम आयोजना गरिएको कलेजका प्रिन्सिपल किशोर अधिकारीले बताए । मानिसको जीवन बचाउने कार्यका लागि रगत आवश्यक भएकोले र गर्मी मौसममा बढ्ने डेंगु, मलेरिया जस्ता अन्य रोगका कारणले हाल ललितपुरलगायत देशभरमा उच्च रक्त अभाव भएको अवस्थालाई मध्यनजर गर्दै रगतको परिपूर्ति गर्नका लागि रक्तदान कार्यक्रम आयोजना गरिएको प्रिन्सिपल अधिकारीले बताए । मानिसको जीवन बचाउने कार्यका लागि रगत अत्यावस्यक हुने र रक्तदान महादान भएकोले रक्तदान गर्नका लागि प्रोत्साहित गर्नु पर्ने अधिकारीले बताए । उक्त कलेजले आफ्नो नैतिक र सामाजिक उत्तरदायित्व अनुरुप विद्यार्थीहरुको पठनपाठन सहितका रक्तदान कार्यक्रमलगायत विभिन्न सामाजिक कार्यक्रम समेत सञ्चालन गर्दै आइरहेको छ ।
पछिल्लो समय अभिभावक र विद्यार्थीहरुको रोजाइमा पर्दै आएको ब्राइट फ्युचर माध्यमिक विद्यालय र कलेजले गुणस्तरीय शिक्षामा कुनै सम्झौता नगरेको कलेजका प्रिन्सिपल अधिकारीले बताए । विद्यार्थीहरुलाई अतिरिक्त क्रियाकलापका साथै पढाइमा केन्द्रित गर्न कलेजले कुनै कुरामा सम्झौता नगरेको अधिकारीले बताए । उक्त कलेजमा मन्टेश्वरीदेखि स्नातक तहसम्म पढाइ हुने यस शिक्षालयमा हाल कक्षा ११ र १२ मा विज्ञान, व्यवस्थापन, शिक्षा, कानुन, मानविकी र स्नातक तहमा बिबिएस, बि.एड. फ्याकल्टी र सिए कक्षामा अध्यान अध्यापन गर्दै आइरहेको छ ।
