काठमाडौं — नेपालमा पहिलोपटक ‘गौविज्ञान कथा’ शीर्षकको विशेष कार्यक्रम आयोजना हुने भएको छ। गौसंरक्षण अभियान नेपालद्वारा आयोजित उक्त कार्यक्रममा गाईसँग सम्बन्धित आध्यात्मिक, परम्परागत तथा स्वास्थ्यसम्बन्धी विषयमा विस्तृत जानकारी प्रदान गरिने जनाइएको छ।
कार्यक्रम पशुपतिनाथ मन्दिर (दक्षिण ढोका) नजिक रहेको सुमार्ग स्मृति भवनमा आयोजना हुने छ। साथै महोत्तरीको गोशाला बजारस्थित गोशाला उद्योग वाणिज्य संघको सभाहलमा पनि समानान्तर रूपमा कार्यक्रम सञ्चालन गरिने आयोजकले जनाएको छ।
कार्यक्रममा भारत सरकारका पूर्व सचिव (IAS, सेवानिवृत्त) डा. कमल दवड़ी प्रमुख अतिथिका रूपमा सहभागी हुनेछन्। यस्तै, पारम्परिक वैद्यरत्न तथा पञ्चगव्य विद्यापीठका गुरुकुलपति निरञ्जन कुमार शर्मा मुख्य अतिथिका रूपमा रहनेछन्।
आयोजकका अनुसार बिहान ९ बजेदेखि मध्याह्न १२ बजेसम्म ‘गौविज्ञान कथा’ प्रवचन सञ्चालन हुनेछ। त्यसपछि सहभागीहरूका लागि भोजनको व्यवस्था गरिनुका साथै दिउँसो निःशुल्क नाडी परीक्षण तथा स्वास्थ्य परामर्श सेवा प्रदान गरिनेछ।

कार्यक्रमको अर्को आकर्षणका रूपमा गाईबाट उत्पादित पञ्चगव्य सामग्रीको प्रदर्शनीसमेत रहने बताइएको छ। आयोजकले कृषक, गोपालक तथा सर्वसाधारणलाई कार्यक्रममा सहभागी भई लाभ लिन आग्रह गरेको छ।