काठमाडौं – नायक विजय बराल केन्द्रीय भूमिकामा रहेको फिल्म ‘जनै हराएको बाहुन’ को प्रदर्शन मिति भदौ ६ लाई तोकिएको थियो ।
‘पूर्णबहादुरको सारङ्गी’पछि यही फिल्ममा विजय शीर्ष भूमिकामा देखिँदै छन् । यो फिल्मको अहिले पोस्ट प्रोडक्सनको काम जारी छ ।
यो फिल्मको नाम घोषणादेखिनै विवादमा परेको थियो । हिन्दू धर्मसँग सम्बन्धित केही व्यक्तिहरुले यो फिल्मको नाममा चासो देखाएका थिए ।
उनीहरुले आफ्नो आस्था र संस्कारलाई नकारात्मक व्यङग्य भएको भन्दै चासो देखाएका थिए । यस विषयमा फिल्म निर्माण पक्षले ध्यानकर्षण भएको बताएको छ ।
निर्माण पक्षले यस फिल्मको नाम परिवर्तन गरेको छ । सोमबार फिल्मको नयाँ पोस्टर सार्वजनिक गर्दै निर्माण पक्षले नाम परिवर्तन गरेको हो । अब यस फिल्मको नयाँ नाम ‘जनै हराएको बाहुन स् सम्बन्धका धागाहरु’ राखिएको छ ।
फिल्मको प्रदर्शनमा बाधा आउने जोखिम रहेको भन्दै नाम परिवर्तन गरिएको निर्माण पक्षको दाबी छ ।
यस फिल्ममा विजयसहित नायिका केकी अधिकारी र मिरुना मगर शीर्ष भूमिकामा छन् । हिमाल न्यौपानेको निर्देशन रहने यो फिल्मको कथा, पटकथा र संवाद भानुभक्त ढकालले लेखेका हुन् ।
पेपरक्लिपको ब्यानरमा बनेको यस फिल्मका निर्माताहरु कमल न्यौपाने र विमल न्यौपाने हुन् ।
