धादिङ — धादिङको त्रिपुरासुन्दरी गाउँपालिका–५, थापा कठेरीमा एक युवाले धारिलो हतियार प्रयोग गरी आफ्नै आमाको विभत्स हत्या गरेका छन्।
असोज १९ गते राति करिब ८ बजे अत्यधिक मदिरा र लागुऔषध सेवन गरेका ३० वर्षीय यमबहादुर कँडेलले खुकुरी प्रहार गरी ५५ वर्षीया आमा राममाया कँडेलको हत्या गरेका हुन्। टाउको छुट्टिएको अवस्थामा उनको शव घरको आँगनमा फेला परेको प्रहरीले जनाएको छ।
घटनाबारे जानकारी पाएपछि छिमेकी, स्थानीय जनप्रतिनिधि र प्रहरी घटनास्थल पुगेका थिए। तर, यमबहादुरले खुकुरी देखाई धम्की र गालीगलौज गर्दै स्थानीयलाई आतंकित बनाएका थिए। त्यसपछि प्रहरी चौकी सल्यानकोटबाट गएको टोलीले उनलाई नियन्त्रणमा लिएर जिल्ला प्रहरी कार्यालय धादिङमा बुझाएको छ।
प्रारम्भिक अनुसन्धानअनुसार, अत्यधिक लागुऔषध सेवन गर्ने बानी भएका यमबहादुरलाई सुधार केन्द्रमा पठाउने विषयमा विवाद हुँदा घटना भएको बताइन्छ। उनी यसअघि पनि विभिन्न आपराधिक गतिविधिमा संलग्न रहेको प्रहरीले जनाएको छ।
काठमाडौंमा बस्दै आएका यमबहादुर दशैं मनाउन फूलपातीको अघिल्लो दिन मात्र घर फर्किएका थिए। घटनाको समयमा घरमा बुबा, आमा, भान्जा, भान्जी र उनी गरी पाँच जना थिए। उनले सुरुमा भान्जालाई आक्रमण गर्न खोजेका थिए, तर भान्जा र बुबा भागेर ज्यान जोगाउन सफल भएका थिए।
घटनाबारे थप अनुसन्धान भइरहेको जिल्ला प्रहरी कार्यालय धादिङले जनाएको छ।
