काठमाडौं :देशभरका लघुवित्त ऋण पीडितहरूले सरकारसँग समस्या समाधानको माग गर्दै काठमाडौंमा आन्दोलन चर्काएका छन्। संघर्ष समितिका अनुसार, ऋणका नाममा लघुवित्तहरूले गरेको आर्थिक र सामाजिक शोषण अन्त्य गर्न पटक–पटक माग गर्दा पनि सरकारले चासो नदेखाएको भन्दै उनीहरूले आन्दोलनलाई थप कडा बनाउने चेतावनी दिएका छन्।
गत चैत ९ देखि सुरु भएको आन्दोलनमा अहिले पनि दैनिक धर्ना र प्रदर्शन जारी छ भने ४ दिनदेखि आमरण अनशनमा रहेका एकजना पीडितको स्वास्थ्य अवस्था गम्भीर भएको छ। उनलाई अस्पतालमा भर्ना गरिएको छ।
संघर्ष समितिले सरकारसँग ब्याज मिनाहा, घर–जग्गा लिलामी रोक्न, पीडितलाई कालोसूचीबाट हटाउन, मुद्दा खारेज गर्न र दमन बन्द गर्न माग गरेको छ। अध्यक्ष मनि राम जवालिले प्रेस विज्ञप्ति जारी गर्दै भने, “पीडितमाथि भएको अन्याय तत्काल अन्त्य हुनुपर्छ। गोली ठोकेर वा जेल हालेर समस्या समाधान हुँदैन।”
सरकार र सरोकारवालालाई वार्ता र समाधानतर्फ ध्यान दिन आग्रह गर्दै समितिले आन्दोलनमा दमन नगर्न चेतावनी दिएको छ। साथै सबै नागरिक, राजनीतिक दल र संघसंस्थालाई पीडितको पक्षमा ऐक्यबद्ध हुन पनि समितिले आग्रह गरेको छ ।
