दैलेखमा चक्कु प्रहारबाट एक १६ वर्षीय किशोरको मृत्यु भएको छ। दुल्लू नगरपालिका ४, शान्ति बजारका प्रकाश खनालको चक्कु प्रहारबाट ज्यान गएको हो ।
जिल्ला प्रहरी कार्यालय दैलेखका प्रमुख डीएसपी गणेशबहादुर बरालका अनुसार उपचारका क्रममा दुल्लू अस्पतालमा खनालको मृत्यु भएको हो । फुटबल खेलेर घर फर्किरहेका खनालमाथि दाहिने कोखाबाट पेटतर्फ निस्कने गरी चक्कु प्रहार गरिएको प्रहरीले जनाएको छ ।
घटनापछि फरार भएका दुल्लू नगरपालिका १०, गमौडीका १९ वर्षीय मुकुन्द शाही र १९ वर्षीय विभूषण शाहीलाई प्रहरीले घटनास्थलबाट करिब १० किलोमिटर टाढा चामुण्डा क्षेत्रको जंगलबाट पक्राउ गरेको छ ।
प्रारम्भिक अनुसन्धानका क्रममा एउटै किशोरीलाई मन पराउने विषयमा विवाद हुँदा घटना भएको खुलेको प्रहरीले जनाएको छ । प्रत्यक्षदर्शीका अनुसार मुकुन्द शाहीले खनालसँग कुनै संवाद नगरी पछाडिबाट एक्कासी चक्कु प्रहार गरी घटनास्थलबाट जंगलतर्फ फरार भएका थिए ।
घटनापछि दुल्लू क्षेत्र शोकमग्न बनेको छ । प्रहरीले घटनाबारे थप अनुसन्धान गरिरहेको जनाएको छ ।
