काठमाडौं – आज साउन १५ गते देशभर खिर खाएर परम्परागत रूपमा मनाइँदै छ। नेपाली समाजमा असार १५ गते दही–च्युरा खाने र साउन १५ गते खिर खाने चलन रहिआएको छ।
वर्षायाममा पर्ने साउने झरीका बेला तातो खिर सेवन गर्दा स्वास्थ्यका लागि लाभदायक हुने जनविश्वास छ। दूध, चामल, चिनी तथा मरमसलालगायतका सामग्री मिसाएर बनाइने खिरले शरीरलाई ऊर्जा दिनुका साथै रोग प्रतिरोधात्मक क्षमता बढाउन सहयोग गर्ने विश्वासका कारण पनि यो परम्परा पुस्तौंदेखि निरन्तर रहँदै आएको मानिन्छ।
धार्मिक, सांस्कृतिक र स्वास्थ्यसँग जोडिएको यस परम्पराले परिवारका सदस्यलाई एकै ठाउँमा भेला गराई खुसी साटासाट गर्ने अवसरसमेत प्रदान गर्दै आएको छ।