काठमाडौं : देशको स्वास्थ्यसम्बन्धी नीतिनिर्माण र जनस्वास्थ्य सुरक्षाको मुख्य निकाय स्वास्थ्य तथा जनसंख्या मन्त्रालय आफैँ डेंगुका कारण जोखिममा परेको देखिएको छ।
मन्त्रालय परिसरमै ढल ट्यांकीहरू खुला अवस्थामा रहनु, फोहोर पानी थुप्रिनु र प्लास्टिकका बोतल र कागजहरु त्यहीँ पानीमा हुनुले डेंगु संक्रमणको सम्भावना अत्यन्तै उच्च बनाएको छ।
मन्त्रालयको प्राङ्गणभित्रै रहेका ढल ट्यांकी र नालीहरूमा पानी जमेर लामखुट्टे प्रजननका लागि उपयुक्त वातावरण बनेको छ।
खुला ढकनी, प्लास्टिकजन्य फोहोर, सुस्त सरसफाइ तथा जथाभावी पाइप व्यवस्थापनले मन्त्रालय परिसर स्वयम् डेंगु रोग फैलाउने मुख्य केन्द्र बन्ने खतरा उत्पन्न भएको छ।
