भरतपुर – श्रावण २४ गतेदेखि ३१ गतेसम्म भरतपुर-६, केशरबागस्थित अक्षय श्री कल्की राजदरबारमा एक ऐतिहासिक तथा दुर्लभ साधना कार्यक्रम आयोजना हुँदैछ। ‘अहिलेसम्म नभएको यस्तो दिव्य ५ कार्यक्रम’ भनेर प्रचार गरिएको यो धार्मिक आयोजनाले श्रीकृष्ण अष्टमीको अवसर पारेर सम्पूर्ण दोष शुद्धि, आत्मिक उत्थान र सृष्टिको कल्याणको लक्ष्य लिएको छ।
कार्यक्रमका मुख्य विशेषताहरूमा दुर्लभ ब्रह्म योग साधना, दैनिक विशेष पूजा, जडिबुटी र घिउबाट मात्र गरिने यज्ञ हवन, आध्यात्मिक प्रवचन, कल्की युगल सरकारद्वारा गुरु पूर्णिमादेखि फलाहार व्रतसहित विशेष साधना, र ५१ सुतको घिउ बत्ति बालिने क्षमायाचन पूजन समावेश छन्।
कार्यक्रमको अन्तिम दिन श्रीकृष्ण अष्टमी (श्रावण ३१ गते) को दिन कम्तिमा एक दिन उपस्थित भएर दिव्य आशीर्वाद प्राप्त गर्न सकिने आयोजकले जनाएका छन्।
कार्यक्रमको क्रममा अष्टधातुको पादुका, चाँदीको जनै, र पाँच पिरामिड भएको मुकुट धारणजस्ता दुर्लभ धार्मिक गतिविधिहरू पनि हुनेछन्।
धार्मिक आस्थावान व्यक्ति तथा साधकहरूलाई कार्यक्रममा सहभागी भई आत्मिक अनुभूति लिन आयोजकले अनुरोध गरेका छन्। टाढा रहेका इच्छुक भक्तजनहरूले QR कोड वा खाता नम्बरमार्फत सहयोग गर्न सक्ने व्यवस्था गरिएको छ।
