काठमाडौं । देशमा मौलाउँदै गएको भ्रष्टाचार, कुशासन तथा लघुवित्तमार्फत भइरहेको वित्तीय शोषणविरुद्ध संयुक्त रूपमा अघि बढ्ने उद्देश्यसहित आम जनता पार्टी, जनादेश पार्टी नेपाल र लघुवित्त तथा वित्तीय शोषणविरुद्धको संघर्ष समितिबीच आगामी निर्वाचनमा चुनावी सहकार्य गर्ने सहमति भएको छ।
तीन पक्षबीच भएको सहमति अनुसार प्रत्यक्ष तथा समानुपातिक दुवै तर्फका उम्मेदवार छनोट आपसी समझदारीका आधारमा गरिनेछ। भ्रष्टाचार, ठगी र वित्तीय शोषणका कारण पीडित बनेका नागरिकलाई न्याय दिलाउन कानुनी, राजनीतिक तथा जनआन्दोलनका माध्यमबाट निर्णायक संघर्ष गर्ने प्रतिबद्धता व्यक्त गरिएको छ।
सहमति–पत्रमा लघुवित्त तथा वित्तीय संस्थाबाट भएका अन्यायपूर्ण र अमानवीय व्यवहारका कारण हजारौँ नागरिक आर्थिक, मानसिक र सामाजिक शोषणमा परेको उल्लेख गर्दै राज्य संयन्त्रलाई जनउत्तरदायी बनाउन दबाब सिर्जना गर्ने सहमति गरिएको छ।
उक्त सहमति २०८२ पौष १२ गते सम्पन्न भएको हो। सहमति–पत्रमा आम जनता पार्टी, जनादेश पार्टी नेपाल र लघुवित्त संघर्ष समितिका प्रतिनिधिहरूले हस्ताक्षर गरेका छन्।