२०७९ को स्थानीय तह निर्वाचनसँगै कहिले अटेरी अभियान, कहिले लौरो अभियान, कहिले नागरिक विद्रोह त कहिले GenZ 2.0 को नाममा सक्रिय रहँदै आएको स्वतन्त्र राजनीतिक धार अहिले गम्भीर प्रश्नको सामना गरिरहेको छ — “लौरो कता हरायो?”
यही प्रश्नको उत्तर खोज्दै देशभरका लौरो उम्मेदवार तथा स्वतन्त्र अभियन्ताहरूको व्यापक भेला भोलि बुढानगरमा आयोजना हुँदैछ। भेलालाई स्वतन्त्र राजनीति र लौरो अभियानको भविष्य तय गर्ने निर्णायक मोडका रूपमा हेरिएको छ।
लौरो अभियानका केन्द्रीय प्रवक्ता डा. हरि कार्कीका अनुसार यो भेला कुनै नयाँ राजनीतिक प्रयोग नभई वास्तविक स्वतन्त्रहरूको स्वाभाविक उत्तराधिकार सुनिश्चित गर्ने प्रयास हो। “२०७९ पछि एउटै संगठनले विभिन्न नाम र स्वरूपमा निरन्तर संघर्ष गर्‍यो। आज लौरो कहाँ हरायो भन्ने प्रश्न स्वाभाविक छ, र यसको उत्तर अब सार्वजनिक रूपमा खोजिनुपर्छ,” उहाँले बताउनुभयो।
डा. कार्कीका अनुसार स्वतन्त्र उम्मेदवारहरूको निरन्तर मेहनतले आज विभिन्न तहमा समन्वय, तालमेल र वैचारिक स्पष्टता बढेको छ। “लौरो अभियानको देशव्यापी संगठन विस्तार र संवादको जिम्मेवारी केन्द्रीय अध्यक्षद्वारा लिखित रूपमा तोकिएको छ। त्यसैले लौरोको वास्तविक उत्तराधिकारी को भन्ने विषयमा अब अन्योल रहनु पर्दैन,” उहाँले स्पष्ट पार्नुभयो।
राजनीतिक विश्लेषकहरूका अनुसार यस भेलाले काठमाडौं महानगर प्रमुख बालेन शाह र राष्ट्रिय स्वतन्त्र पार्टी सभापति रवि लामिछानेको टिमसहित समग्र नयाँ राजनीतिक धारमा दबाब र तरंग सिर्जना गर्ने सम्भावना छ। भेलाबाट स्वतन्त्र राजनीति, लौरो अभियानको दिशा र भावी रणनीतिबारे गम्भीर निर्णयहरू आउने अपेक्षा गरिएको छ।