जनकपुरधाम । राष्ट्रिय स्वतन्त्र पार्टीका केन्द्रीय प्रवक्ता तथा धनुषा क्षेत्र नं. ३ बाट प्रतिनिधिसभाका उम्मेदवार मनिष झाले आफ्नो निर्वाचन क्षेत्रमा चुनावी पोस्टर नटाँस्ने घोषणा गरेका छन् ।
झाले जनकपुरधामलाई सफा र सुन्दर राख्ने उद्देश्यले यस्तो निर्णय लिएको बताएका हुन् ।
झाले भने, “म जुन देश र नगरलाई सुन्दर बनाउन राजनीतिक अभ्यासमा छु, त्यही नगरलाई कुरूप बनाएर चुनावी प्रचार–प्रसार गर्न चाहन्न ।”
उनले रास्वपाका सबै कार्यकर्तालाई धनुषा क्षेत्र नं. ३ भित्र कुनै पनि स्थानमा प्रचार सामग्रीका रूपमा पोस्टर नटाँस्न स्पष्ट निर्देशन दिएका छन् ।
उनले निर्वाचन प्रचार–प्रसारको नाममा शहरलाई फोहोर र अव्यवस्थित नबनाउन अन्य राजनीतिक दल तथा उम्मेदवारहरूलाई समेत आग्रह गरेका छन् ।
उनका अनुसार, स्वच्छ र सभ्य राजनीतिक संस्कारको विकास आजको आवश्यकता हो, र त्यसको सुरुवात आफ्नै व्यवहारबाट गर्नुपर्छ ।
झाको यस पहलप्रति स्थानीयवासी, नागरिक समाज तथा विभिन्न संघ–संस्थाबाट सकारात्मक प्रतिक्रिया आएको छ ।
जनकपुरधामलाई फोहोरमुक्त र व्यवस्थित सहर बनाउने अभियानमा यो कदम उदाहरणीय भएको टिप्पणी गरिएको छ । राजनीतिक प्रतिस्पर्धाका बीच वातावरणमैत्री र जिम्मेवार प्रचार शैली अपनाउने झाको निर्णयले आगामी चुनावी अभियानमा नयाँ सन्देश दिएको देखिन्छ ।
