काठमाडौं । नक्कली कागजात प्रयोग गरी नेपाली नागरिकता लिएको आरोपमा एक भारतीय नागरिक पक्राउ परेका छन्। पक्राउ पर्नेमा बिनय टिबडेवाल रहेका छन्।
प्राप्त जानकारी अनुसार टिबडेवालले पर्साको बिरगंज उप- महानगरपालिका–१३ बाट नेपाली नागरिकता लिएको बताइएको छ। उनले काठमाडौं महानगरपालिका स्वयम्भू–छाउनी ठेगाना देखाउँदै हेलमेट व्यवसाय सञ्चालन गर्ने गरेको खुलेको छ।
तर व्यवसायको आवरणमा उनले बैंकिङ प्रणाली दुरुपयोग गर्दै कालोसूचिमा परेका व्यक्तिहरूको नाममा नयाँ खाता खुलाउने, चेकबुक प्रयोग गरी अनुचित लेनदेन गर्ने तथा चिनजान नभएका सर्वसाधारणसँग समेत चेक कारोबार गर्ने गरेको आरोप लगाइएको छ।
यस कार्यमा नुवाकोट घर भई हाल काठमाडौं चाबहिल बस्दै आएकी बिन्दा ढुङ्गेलसँग मिलेर सोझा–साझा महिलाहरूलाई ठगी गर्ने गिरोह सञ्चालन गरेको आरोप समेत लागेको छ।
उक्त व्यक्तिलाई स्वयम्भू क्षेत्रबाट अनुचित लेनदेन तथा संघर्ष समितिको पहलमा हिजो पक्राउ गरिएको जनाइएको छ। घटनाबारे थप अनुसन्धान भइरहेको बताइएको छ।