काठमाडौं – पाँच वटा बैंकिङ कसुर मुद्दामा फरार रहेका एक अभियुक्त पक्राउ परेका छन्।
पक्राउ पर्नेमा धादिङको ज्वालामुखी गाउँपालिका–३ निवासी ३३ वर्षीय अन्जन भट्ट रहेका छन्। उनलाई काठमाडौं उपत्यका अपराध अनुसन्धान कार्यालयको टोलीले कागेश्वरी मनोहरा नगरपालिका–७ बाट पक्राउ गरेको हो।
अपराध अनुसन्धान कार्यालयका प्रहरी उपरीक्षक (एसपी) रामेश्वर कार्कीका अनुसार भट्टविरुद्ध विभिन्न प्रहरी कार्यालयमा बैंकिङ कसुर सम्बन्धी पाँच वटा उजुरी दर्ता भएका थिए।
जिल्ला प्रहरी कार्यालय चितवनमा ५० लाख रुपैयाँ बराबरको बैंकिङ कसुरको मुद्दा दर्ता भई उनी फरार रहेका थिए। त्यसैगरी जिल्ला प्रहरी परिसर ललितपुरमा १५ लाख रुपैयाँ, जिल्ला प्रहरी परिसर काठमाडौंमा १ लाख ४८ हजार रुपैयाँ, प्रहरी वृत्त बालाजुमा २ लाख ५० हजार रुपैयाँ तथा प्रहरी वृत्त कालिमाटीमा १ लाख ८० हजार रुपैयाँ बराबरको बैंकिङ कसुरको उजुरी दर्ता भएको प्रहरीले जनाएको छ।
प्रहरीले पक्राउ परेका भट्टलाई आवश्यक कानुनी कारबाहीका लागि सम्बन्धित प्रहरी कार्यालयमा पठाइएको जनाएको छ।
