काठमाडौं – देशभर लघुवित्त, सहकारी, बैंक तथा मिटरब्याज पीडितहरूका लागि संघीय राजधानी काठमाडौंमा स्थायी घरबासको पहल सुरु गरिएको छ। हालसम्म पाँच सयभन्दा बढी विस्थापित घरपरिवारलाई पुनःस्थापनाका लागि तयारी भइरहेको लुम्बिनी प्रदेश प्युठानका राष्ट्रिय स्वयंसेवक रोमन थापाले बताएका छन्।
उनका अनुसार दशौँ वर्ष लागे पनि वित्तीय शोषणविरुद्धको संघर्ष आफ्नो परिवारसहित काठमाडौंमै निरन्तर गर्न सकियोस् भनेर जमिन उपलब्ध गराउने तयारीमा पहल भइरहेको छ।
“अब लघुवित्त र बैंकहरूले घर लिलाम गरे, ब्ल्याकलिस्टमा राखे पनि डराउनु पर्ने अवस्था छैन। गास, बास र कपासको कुनै चिन्ता लिनु पर्दैन,” थापाले भने।
थापाले देशका सबै जिल्लामा रहेका लघुवित्त तथा वित्तीय शोषणविरुद्ध संघर्षरत अभियन्ताहरूलाई एकआपसमा समन्वय गरी पीडितहरूलाई सम्पर्कमा रहन आग्रह गरेका छन्।
उनले जनाए अनुसार काठमाडौंमा पुनःस्थापनाको लागि आवश्यक पूर्वाधार तयार पारिँदैछ र आगामी दिनमा अझ ठूलो संख्यामा पीडित परिवारलाई राहत दिने लक्ष्य लिएको छ।
यसअघि पनि विभिन्न ठाउँमा लघुवित्तका ऋणमा परेका नागरिकहरूको घर लिलामीमा परेको, आत्महत्या जस्ता गम्भीर घटना भएका खबरहरू सार्वजनिक भइरहेका छन्। यसै कारण देशभर पीडितहरूको साझा मञ्च बनेको छ र उनीहरूले विभिन्न आन्दोलन, दबाब र पुनःस्थापनाको कार्यक्रमहरू सञ्चालन गर्दै आएका छन्।
