ललितपुर । आयुर्वेदमा वर्णन गरिएको बालबालिकाका लागि अत्यन्त लाभदायक औषधियुक्त थोपा स्वर्णबिन्दु प्राशन कार्यक्रम आयुर्वेद तथा वैकल्पिक चिकित्सालय, ललितपुरले सञ्चालन गरिरहेको छ। प्रत्येक महिनाको पुष्य नक्षत्रका दिन नियमित रूपमा खुवाइने स्वर्णबिन्दु प्राशन अन्तर्गत १ वर्षदेखि ५ वर्षसम्मका बालबालिकालाई निःशुल्क सेवा प्रदान गरिँदै आएको चिकित्सालयले जनाएको छ।
आयुर्वेदिक मान्यताअनुसार नियमित स्वर्णप्राशन गराउँदा बालबालिकाको शारीरिक तथा मानसिक विकासमा सहयोग पुग्ने, रोग प्रतिरोधात्मक क्षमता बढ्ने, स्मरण शक्ति र एकाग्रता वृद्धि हुने तथा पाचन प्रणाली सुदृढ हुने विश्वास गरिएको छ। यही उद्देश्यका साथ कार्तिक महिनादेखि सुरु गरिएको कार्यक्रममा हालसम्म करिब तीनसय जना बालबालिकाले स्वर्णबिन्दु प्राशन कार्यक्रमबाट लाभान्वित भएका छन् ।
चिकित्सालयका अनुसार कार्यक्रम बिहान ८ बजेदेखि दिउँसो ३ बजेसम्म आयुर्वेद तथा वैकल्पिक चिकित्सालय परिसरमै सञ्चालन भइरहेको छ। सोही दिन बाल रोग विशेषज्ञको उपस्थितिमा बालबालिकाको स्वास्थ्य परीक्षणसमेत गरिने भएकाले अभिभावकहरूको उल्लेख्य सहभागिता देखिएको छ।
कार्यक्रमअन्तर्गत रुघा–खोकी, ज्वरो, खाना नपचेको अवस्था, झाडापखाला लागेको वा आऊँ परेको जस्ता समस्याहरू देखिएका बालबालिकालाई भने स्वर्णबिन्दु खुवाइँदैन। चिकित्सकको सल्लाहअनुसार मात्र सेवा प्रदान गरिने चिकित्सालयले स्पष्ट पारेको छ।
अभिभावकहरूले कार्यक्रमले बालस्वास्थ्य प्रवर्द्धनमा महत्वपूर्ण योगदान पुर्याएको प्रतिक्रिया दिएका छन्। आयुर्वेद तथा वैकल्पिक चिकित्सालयले आगामी दिनमा पनि पुष्य नक्षत्रका दिनहरूमा नियमित रूपमा कार्यक्रम निरन्तरता दिने जनाएको छ।
बालबालिकाको दीर्घकालीन स्वास्थ्य सुदृढीकरणका लागि आयुर्वेदिक पद्धतिलाई व्यवहारमा उतार्ने उद्देश्यसहित सञ्चालन गरिएको यो कार्यक्रम अभिभावक र समुदायबाट सकारात्मक रूपमा ग्रहण भइरहेको छ।
