काठमाडौं — जेन-जी नेपालले शुक्रबार काठमाडौंको रिपोर्टर्स क्लबमा आयोजना गरेको पत्रकार सम्मेलन सम्पन्न भएको छ। सम्मेलनमा हालैको आन्दोलन, सरकारले लिएका कदम, प्रहरीद्वारा गरिएको गिरफ्तारी, र विभिन्न मुद्दामा जेन-जीको धारणा सार्वजनिक गरिएको छ।
कार्यक्रममा वक्ताहरूले सरकारले जेन-जी आन्दोलनलाई दमन गरेर युवाहरूको आवाज दबाउने प्रयास गरेको आरोप लगाएका थिए। उनीहरूले आन्दोलनका मागहरू जायज र जनजीवनसँग प्रत्यक्ष जोडिएका भएको बताउँदै, सरकारसँग संवाद र समाधानका लागि तत्पर रहेको स्पष्ट पारे।
त्यसैगरी, सम्मेलनमा सहकारी तथा लघुवित्त पीडित, भूमि र सुकुम्बासी समुदाय, भूपू सुरक्षाकर्मी लगायतका समूहहरूसँगको सहकार्य र साझा संघर्षका पहलहरूबारे जानकारी दिइयो।
कार्यक्रमको अन्त्यमा जेन-जी नेपालले सबै समूहबीच एकता, सहकार्य र साझा उद्देश्यका लागि साथ दिन अपिल गरेको छ।
रिपोर्टर्स क्लबमा भएको उक्त कार्यक्रममा विभिन्न सञ्चार माध्यमका पत्रकार, सरोकारवाला र नागरिक समाजका प्रतिनिधिहरूको उपस्थिति रहेको थियो।
