बिरेन्द्रनगर – जेन्जी २.० कर्णाली को नेतृत्वमा बिरेन्द्रनगर नगरपालिकासँगको सहकार्यमा ‘सफा बिरेन्द्रनगर अभियान’ अन्तर्गत बसपार्क सरसफाइ विशेष कार्यक्रम दोस्रो पटक सञ्चालन हुने भएको छ। यो कार्यक्रम अघिल्लो सरसफाइ गतिविधिको निरन्तरताको रूपमा आयोजना गर्न लागिएको हो, जहाँ त्यस दिन गरिएका प्रतिबद्धताहरूको कार्यान्वयन प्रक्रिया सुरु हुँदैछ।
Gen-Z 2.0 Karnali ले यस अभियानलाई बिरेन्द्रनगर नगरपालिकासँगको सहकार्यको उत्सवका रूपमा समेत लिएको जनाएको छ। सफा, व्यवस्थित र जिम्मेवार बिरेन्द्रनगर निर्माणतर्फको साझा यात्रामा यो अभियानलाई महत्वपूर्ण कदमका रूपमा हेरिएको छ।
बिरेन्द्रनगर नगरपालिकासँग भएको बैठकमा बसपार्क क्षेत्रको छोटो तथा दीर्घकालीन फोहोर व्यवस्थापनका विषयमा विस्तृत छलफल भएको थियो। साथै अभियानलाई निरन्तर र प्रभावकारी बनाउने विषयमा दुवै पक्षबीच साझा प्रतिबद्धता व्यक्त गरिएको छ। नगरपालिकाले बसपार्क फोहोर व्यवस्थापनका लागि अन्तिम प्रस्ताव (Final Draft Proposal) तयार गर्न Gen-Z 2.0 Karnali लाई आग्रह गरेको छ।
अभियान अन्तर्गत तत्काल सुरु हुने ठोस सहयोगहरूमा बिरेन्द्रनगर नगरपालिकाको सहयोगमा बसपार्क क्षेत्रमा २५ वटा डस्टबिन जडान गरिने तथा अभियानलाई निरन्तर सञ्चालन गर्न आवश्यक सरसफाइ उपकरणहरू उपलब्ध गराइने जनाइएको छ।
आयोजकका अनुसार यो अभियान केवल एकदिनको सरसफाइमा सीमित नभई नीति, प्रतिबद्धता र निरन्तरतामा आधारित दिगो परिवर्तनको सुरुवात हो।
कार्यक्रम शनिबार, पौष १२ गते बिहान ९ बजे बिरेन्द्रनगर बसपार्कमा सञ्चालन हुनेछ। आयोजकले सबै सचेत नागरिक, युवा स्वयंसेवक तथा सरोकारवालाहरूलाई अभियानमा सहभागिता जनाउन आग्रह गरेका छन्।
सफा बिरेन्द्रनगर — हाम्रो साझा जिम्मेवारी।